2Cor 9 | GbrGAW | STEP | Mi kpelo ge ko to zhin tile nu, ma ka ga fye ntu Shekwoyi aza bmazhin ɓo m.

2 Corinthians 9

1 Mi kpelo ge ko to zhin tile nu, ma ka ga fye ntu Shekwoyi aza bmazhin ɓo m. 2 Gama mi kpelo shi a wo fye pwa lo fya zhin ce, har ma gma n a nugundo aba n Makidoniya nge, fye ɓei n cei pma fya tnu a bmazhin tunyi ntna. Ɓehin-hin, efye bugba napye nu, na ga aza ɓe pwawo ɓa bmazhin. 3 Ama mi tnu n naza deyeyi ya kpe dei-dei ge fye n shiriyi zhin lo, shi ma gnaɓa fye n cei zhin lo, n fye agyi-wyei yezhi, mito n cei pmalo kwa ze n saye ngye mi la bwi aba n mi gma gma yi nfye ɓo m. 4 Vinyiko ɓa wo mi n mwa – nfyei ɓe, n na azan Makidoniya ɓe n gnisun n miyi, to ɓa gye fye nshiri yi zhin mi-i ku gna ɓan.

Ga, Shekwoyi Ɓa Gba Ho Ta

5 Ce na zhin mi-i tnu n na aza deye yi, n mi abye ɓa kpe dei-dei cauta ye n fye ɓei zhin alkawali nyi ala yezhin ai pmi yi. Mi n cei pma kwa wu n gye cauta hin-hin, toge ngye atufye tile nu fyei gam. 6 Ama fye pa ge n fya ga fyewyi, fye ɓei bwa fyewyi, Fwaiza n wa bye nyabye fyewyi wo zhin wa bwa ampanyi fyewyi, ama n wa bye n mwa wa bwa n mwa. 7 Ozaho-zahoi vinya wo ɓa dna nwo bugba shiwo ɓa ga n sun. Fye to tu oza kala wa ga, ndu shi wo ncei pma wa ga n sun, ntuge Shekwoyi ci azanu nɓa ga n bugbayi gmanyi. 8 Shekwoyi ɓami wa ga fye enya n fye to n cei lon, har ndu du ɓo, nnabai n fye ta gba o fye a bukata nu gmanyin, ama har n ko ɓa ce fya ga azaje n bugba bui-buyi. 9 Kwo wu shi littafi a danu, “Shekwoyi ʼza zhin wa ga awyekwoyi nya n bugbayi gmanyi. Owo ɓemana zhin ɓa ze owo mwa-mwa nyalo-nyalo.”

10 Gama Shekwoyi n wo ga fwaiza nyabye, wa bye nyi, n na avun wa do nyabye n mwa wa gyi nyi, wo ɓa ga fye ndudu fya bye wa zhin kwa pa n na bai fya ga nya ndudu dna nfye ampanyi. 11 E, Shekwoyi ɓa ga fye n mwa n nabai fya ga n mwa, esa n ya lo aza nfye nya gayi n na aza aba ɓei sa Shekwoyi ami, ɓai ciwo n tu nfye bmazhin ɓo. 12 Aɓo ngun aba na zhin ntu nfye bmazhin ɓo, aza n ɓa sangyi yi lo ɓa bwa bmazhin, ɓai ci Shekwoyi n jesun. 13 Aza nfya bma zhin aɓa daɓa, to n tukwoyi tu n fye bmazhin n fya zhin ɓa n na azajeyi nyin, ama ɓa ɓei ci Shekwoyi, ntuge ofye a ɓezhin wu lo dei-dei nfye wuwuyi. 14 Ba ɓe zhin adduʼa gafye n bugbayi gmanyi, ntu n Shekwoyi alheri ɓo n na wuɓa nfye aba nyi.

15 Yi sa Shekwoyi ami ntu wo Nugun ɓo, owo cauta n ko du ɓeda asan.